Monday, April 15, 2019

राजेंद्र माने इंजीनिरींगचा ओंकार कुलकर्णी मिस्टर युनिव्हर्सिटी उपविजेता

मुंबई विद्यापीठाच्या वतीने आयोजित युवा महोत्सवाच्या विद्यापीठस्तरीय अंतीम फेरीत जॅकपॉट स्पर्धेत द्वितीय क्रमांक प्राप्त करत आंबव येथील प्र. शि. प्र. संस्थेच्या राजेंद्र माने इंजिनीरिंग कॉलेजचा विद्यार्थि ओंकार कुलकर्णी याने  मिस्टर युनिव्हर्सिटी रनर अप (सिल्व्हर मेडल) हा किताब पटकावला आहे. त्याचबरोबर इंजिनीरिंग क्षेत्रामध्ये हा किताब पटकावणारा तो पहिला विद्यार्थी ठरला आहे.
व्यवस्थापन, क्रीडा, सामान्य ज्ञान, संगीत, नृत्य, अभिनय अशा विविध कलांमधील कौशल्य यांच्या आधारे हि निवड केली जाते. ओंकार कुलकर्णी याने शैक्षणिक वर्ष २०१८-१९ मध्ये महाविद्यालयीन तसेच आंतरमहाविद्यालयीन गायन, मिमिक्री यासारख्या स्पर्धां व विविध कार्यक्रमांच्या व्यवस्थापन समितीमध्ये भाग घेऊन सातत्यपूर्ण अष्टपैलू कामगिरी केली आहे.
त्याने प्राप्त केलेल्या या यशाबद्दल प्र. शि. प्र. संस्थेचे अध्यक्ष मा. रवींद्रजी माने, कार्यकारी अध्यक्षा सौ. नेहा माने, तसेच महाविद्यालयाचे प्राचार्य डॉ. महेश भागवत व सर्व विभागप्रमुख  यांनी त्याचे अभिनंदन केले व भविष्यातील कामगिरीसाठी शुभेच्छा दिल्या महाविद्यालयाचे सांस्कृतिक विभाग समन्वयक प्रा. गणेश जागुष्टे यांचे त्याला या स्पर्धेसाठी मार्गदर्शन लाभले.
महाविद्यालयातील सर्व प्राध्यापकांनी केलेले सहकार्य व आई-वडिलांचा पाठींबा तसेच विविध स्पर्धा कार्यक्रमामधील आपला सहभाग यामुळे हे यश प्राप्त करता आल्याची भावना ओंकार कुलकर्णी याने यावेळी व्यक्त केली.
फोटो:
ओंकार कुलकर्णीचे अभिनंदन करताना प्राचार्य डॉ. महेश भागवत तसेच प्रा. गणेश जागुष्टे

राजेंद्र माने अभियांत्रिकी महाविद्यालयामध्ये मान्यता प्राप्त सी ई टी परीक्षा सराव केंद्र सुरु

आंबव येथील प्र. शि. प्र. संस्थेच्या राजेंद्र माने कॉलेज ऑफ इंजिनिअरिंग अँड टेक्नोलॉजी, महाविद्यालयामध्ये एम.एच.टी. – सी.ई.टी. सराव परीक्षा (मॉक टेस्ट) देण्याची सुविधा प्रवेश नियामक प्राधिकरणाच्या मान्यतेने उपलब्ध करण्यात आली आहे.

जे विद्यार्थी बारावीनंतर इंजिनिअरिंग वा फार्मसी, कोर्सेसना प्रवेश घेऊ इच्छीतात त्यांना एम एच टी – सी ई टी परीक्षा अनिवार्य आहे. प्रवेश नियामक प्राधिकरणद्वारे सदर परीक्षा यावर्षी राज्यस्तरावर ऑनलाईन पद्धतीने घेतली जाणार आहे. बारावी सायन्स मधून परीक्षा दिलेल्या व एम एच टी – सी ई टी २०१९ साठी नोंदणी केलेल्या विद्यार्थ्यांना या परीक्षेचे स्वरूप लक्षात यावे या दृष्टीकोनातून  माने अभियांत्रिकी महाविद्यालयाला  सराव परीक्षा (मॉक टेस्ट) केंद्र सुरु करण्यास मान्यता देण्यात आली आहे.
१.      इच्छुक विध्यार्थानी mhtcetpractisetest2019.offee.in या लिंकवर जाऊन १० एप्रिल पर्यंत आपली नोंदणी करणे अनिवार्य आहे. त्यानंतर संबंधित विद्यार्थ्यांना ११ एप्रिल रोजी एस एम एस किवा ईमेल द्वारे सराव परीक्षा वेळापत्रक कळविले जाईल.
२.      मॉक टेस्ट १२ एप्रिल ते ३० एप्रिल २०१९ या कालवधीत चालणार आहे.
३.      विदयार्थी या सराव परीक्षा (मॉक टेस्ट) सुविधेचा नाममात्र शुल्क देऊन लाभ घेऊ शकतात.
४.      परीक्षा केंद्रावर येताना प्रत्येक विद्यार्थ्याने आपला स्मार्टफोन तसेच १२ वीचे परीक्षा प्रवेशपत्र (हॉल तिकीट) आणणे अत्यावश्यक आहे.
अधिक माहितीसाठी विद्यार्थ्यानी महाविद्यालयातील प्रा. वैभव डोंगरे (मो. नं. ९४२२६६३९१९ / ७७४५००९५५७), प्रा. विस्मयी परुळेकर (मो. नं. ९९७०२८५७२३ /७५८८४४८६८५) अथवा श्री. प्रनिल अणेराव (मो.नं. ७९७२४२१४३७ / ९४२२५६४७१४) यांच्याशी संपर्क साधावा. महाविद्यालयामध्ये उपलब्ध असणा-या या सुविधेचा जास्तीतजास्त विद्यार्थ्यांनी लाभ घ्यावा असे आवाहन महाविद्यालयाचे  प्राचार्य डॉ. महेश भागवत यांनी केले आहे.

Friday, March 29, 2019

राजेंद्र माने अभियांत्रिकी महाविद्यालयामध्ये विद्यार्थी कार्यशाळा संपन्न

राजेंद्र माने अभियांत्रिकी महाविद्यालयाच्या कॉम्पुटर शाखेने विद्यार्थ्यांसाठी आयोजित केलेली कार्यशाळा यशस्वीरीत्या संपन्न झाली.पाच दिवसांच्या या कार्यशाळेमध्ये या शाखेतील द्वितीय वर्षातील विद्यार्थ्यांना “जावा प्रोग्रामिंग” या विषयी तज्ञांचे मार्गदर्शन लाभले.
8 मार्च ते 12 मार्च या दरम्यान ही कार्यशाळा आयोजित करण्यात आली होती. या कार्यशाळेत कॅप जेमिनी, पुणे या कंपनीचे कार्पोरेट ट्रेनर संजय देगावकर हे प्रमुख मार्गदर्शक होते. कार्यशाळेच्या उद्घाटनादरम्यान समन्वयक प्रा. पांडुरंग मगदूम यांनी मान्यवरांची ओळख करून दिली व कार्यशाळेचे प्रास्ताविक केले. यावेळी प्राचार्य डॉ. महेश भागवत, विभागप्रमुख प्रा. मुश्ताक गडकरी, संजय देगावकर, तसेच बहुसंख्य विद्यार्थी विद्यार्थिनी उपस्थित होते.
डॉ. महेश भागवत यांनी ही कार्यशाळा प्रशिक्षण व प्रयोगाधारित असल्याने सध्याच्या अभियांत्रिकी अभ्यासक्रमाला पूरक असून त्याचा विद्यार्थ्यांना पदव्यूत्तर काळात निश्चित फायदा होईल असे सांगितले.
यानंतर ट्रेनर संजय देगावकर यांनी प्रथम जावा विषयी मुलभूत माहिती देऊन जावा सरोलेट, स्टब, स्विंग यासारख्या जावा संबंधित विविध सॉफ्टवेअंर बद्दल महाविद्यालयाच्या विद्यार्थ्यांना मार्गदर्शन केले. त्यांनी जावा मधील समकालीन प्रगतीचा आढावा घेऊन त्यातील बहुतांश सॉफ्टवेअंर मध्ये विद्यार्थ्यांना प्रात्यक्षिकांसह प्रशिक्षण दिले. तसेच अंतिम सत्र काळात याअंतर्गत उपलब्ध असणारे रोजगार, त्यासाठी आवश्यक कौशल्ये विकास आणि त्याची रोजगाराभिमुख उपयुक्तता स्पष्ट केली. सहभागी झालेल्या अंतिम विद्यार्थी विद्यार्थिनीनि समारोपप्रसंगी कार्याशाळेदरम्यान मिळालेले प्रशिक्षण व अनुभव उपयुक्त होते असे सांगितले.
या कार्यशाळेच्या आयोजनासाठी महाविद्यालयाचे प्राचार्य डॉ. महेश भागवत तसेच व्यवस्थापनाचे मार्गदर्शन व पाठबळ लाभले.
फोटो:
1. कार्यशाळेदरम्यान विद्यार्थ्यांना मार्गदर्शन करताना संजय देगावकर

राजेंद्र माने अभियांत्रिकी महाविद्यालयामध्ये विद्यार्थी कार्यशाळा संपन्न

राजेंद्र माने अभियांत्रिकी महाविद्यालयाच्या कॉम्पुटर शाखेने विद्यार्थ्यांसाठी आयोजित केलेली कार्यशाळा यशस्वीरीत्या संपन्न झाली.
तीन दिवसांच्या या कार्यशाळेमध्ये या शाखेतील अंतिम वर्षातील विद्यार्थ्यांना “मशीन लर्निंग” या विषयी तज्ञांचे मार्गदर्शन लाभले.आजच्या काळात कॉम्पुटर शाखेमध्ये पायथॉन प्रोग्रामिंग सारख्या तंत्रज्ञानाचा वापर वाढत आहे. त्यामुळे या शाखेतून पदवी घेणा-या अंतिम वर्षातील विद्यार्थी विद्यार्थिनीना त्यांच्या महाविद्यालयीन शिक्षण कालावधीमध्येच याची माहिती व ज्ञान प्राप्त व्हावे या हेतूने तज्ञांच्या मार्गदर्शनाखाली तीन दिवसांच्या कार्यशाळेचे आयोजन करण्यात आले होते.कार्यशाळेच्या उद्घाटनादरम्यान विभागप्रमुख प्रा. मुश्ताक गडकरी यांनी आपल्या प्रास्ताविकातून कार्यशाळेचा उद्देश स्पष्ट केला. यावेळी प्राचार्य डॉ. महेश भागवत यांनी सध्याचा अभियांत्रिकी अभ्यासक्रम व यामधील रोजगारासाठी आवश्यक असणारी कौशल्ये यांचा समन्वय साधण्यासंदर्भात आपले विचार व्यक्त केले.इंटीलेक्ट टेक्नोलॉजी, मुंबई चे डायरेक्टर राहुल गुप्ता व त्यांचे सहकारी तेजस कसारे यांनी महाविद्यालयाच्या विद्यार्थ्यांना यासंबंधी मार्गदर्शन केले. यावेळी त्यांनी पायथॉन प्रोग्रामिंग व त्याचा मशीन लर्निंग साठीचा वापर, याबद्दल प्रात्यक्षिकांसह प्रशिक्षण दिले.तसेच याअंतर्गत येणा-या विविध प्रकारच्या सॉफ्टवेअर डेव्हेलपमेंटची माहिती दिली. सहभागी झालेल्या अंतिम विद्यार्थी विद्यार्थिनीनि समारोपप्रसंगी कार्याशाळेदरम्यान मिळालेले प्रशिक्षण व अनुभव उपयुक्त होते असे सांगितले.या कार्यशाळेचे नियोजन समन्वयक प्रा. मानसी गोरे यांनी केले. महाविद्यालयाचे प्राचार्य डॉ. महेश भागवत तसेच व्यवस्थापनाचे यासाठी मार्गदर्शन व पाठबळ लाभले.
फोटो:
१. राहुल गुप्ता यांचे स्वागत करताना प्राचार्य डॉ. महेश भागवत तसेच शेजारी तेजस कसारे, मुश्ताक गडकरी, मानसी गोरे इ.
२. कार्याशाळेदरम्यान सह्भागी विद्यार्थी विद्यार्थ्याना मार्गदर्शन करताना राहुल गुप्ता.


राजेंद्र माने अभियांत्रिकी महाविद्यालयाच्या दोन संशोधन प्रकल्पांची निवड !!

आंबव येथील प्र. शि. प्र. संस्थेच्या राजेंद्र माने अभियांत्रिकी महाविद्यालयातील दोन संशोधन प्रकल्पांची मुंबई विद्यापीठ अनुदान

मंडळातर्फे संशोधन अनुदानांतर्गत निवड झाली आहे. यामध्ये कॉम्पुटर विभागातून प्रा. मुश्ताक गडकरी व मेकॅनिकल विभागातून प्रा. मंगेश प्रभावळकर यांच्या प्रकल्पांना मुंबई विद्यापीठातर्फे अनुदानाची घोषणा करण्यात आली आहे. मुंबई विद्यापीठातर्फे अभियांत्रिकी व तंत्रज्ञान तसेच इतर क्षेत्रामध्ये अत्याधुनिक संशोधनाला चालना मिळावी या उद्देशाने विविध संशोधन प्रकल्पांची अनुदानासाठी निवड करण्यात येते. स्वच्छ पाणीपुरवठा, कचरा व्यवस्थापन तसेच पूरनियंत्रण यासाठी प्रामुख्याने स्थानिक सरकारी यंत्रणा काम करीत असतात. तसेच सध्या शहरांमध्ये आगी लागण्याचेही प्रमाणही दिवसेंदिवस वाढत आहे. या सर्वांचा आहे त्या मनुष्यबळाचा वापर करून निपटारा करताना यंत्रणेवरील त्राण वाढत आहे. त्यामुळे यासाठी काहीतरी उपाय सुचविण्याच्या विचारातून प्रा. गडकरी यांनी संशोधन प्रकल्पावर काम करण्यास सुरुवात केली. यामध्ये ते “इंटरनेट ऑफ थिंग्स” आधारित प्रणाली विकसित करणार असून त्यासाठी त्यांना अनुदान प्राप्त झाले आहे. संशोधनांती ते स्थानिक यंत्रणाना उपाय सुचवणार आहेत.
महाविद्यालयाच्या मेकॅनिकल विभागातून निवड झालेले प्रा मंगेश प्रभावळकर सौरउर्जेवर आधारित जलशुद्धीकरण निर्मिती प्रकल्प
प्रतिकृती तयार करणार आहेत. त्यांनी हाती घेतलेली पूर्ण यंत्रणा ही सौरऊर्जेसारख्या अपारंपरिक उर्जास्त्रोतावर आधारित असून त्यामध्ये विशिष्ट उपकरणांद्वारे पाण्याचे शुद्धीकरण, व त्याची योग्यप्रकारे साठवणूक यावर ते काम करणार आहेत.
महाविद्यालयाचे प्राचार्य डॉ. महेश भागवत यांनी संशोधक प्राध्यापकांचे अभिनंदन करताना सांगितले कि, मागील काही वर्षात महाविद्यालयाचे जवळपास तेरा प्रकल्प अनुदानास पात्र ठरले असून यावर्षीही ही परंपरा या प्राध्यापकांनी कायम राखली आहे. ते पुढेम्हणाले कि, जलशुध्धीकरण, शेती, गृहोपयोगी साधने, वाहन उद्योग यासारख्या सर्वसामान्यांशी निगडीत विषयावरती संशोधन करून अभियांत्रिकीचा उपयोग सर्वसामान्यांना करून देण्यामध्ये या प्राध्यापकांचे संशोधनांती मोठे योगदान होईल. संस्थाध्यक्ष मा.रवींद्र माने यांनीही महाविदयालय संशोधन कार्यामध्ये नेहमीच अग्रेसर राहिले असून यापुढील काळामध्येसुध्धा प्राध्यापकांना
संशोधन सुविधा निर्माण करून देण्यात येतील असे सांगितले.
प्राध्यापकांच्या या यशाबद्दल संस्थाध्यक्ष मा. रवींद्र माने, कार्याध्यक्षा सौ. नेहा माने, प्राचार्य डॉ. महेश भागवत, महाविद्यालयाच्या
विविध विभागांचे विभागप्रमुख यांनी या प्राध्यापकांचे अभिनंदन केले.
फोटो:
1. प्रा. मुश्ताक गडकरी
2. प्रा. मंगेश प्रभावळकर


Tuesday, March 5, 2019

राजेंद्र माने अभियांत्रिकी महाविद्यालयाच्या माजी विद्यार्थ्यांचा स्नेहमेळावा संपन्न

प्रबोधन शिक्षण प्रसारक संस्था संचलित आंबव येथिल राजेंद्र माने अभियांत्रिकी महाविद्यालयाच्या माजी विद्यार्थ्यांचा स्नेहमेळावा
नुकताच जनसागर हॉल, पुणे येथे संपन्न झाला. या संमेलनात महाविद्यालयाचे व्यवस्थापन सदस्य, प्राचार्य तसेच विभागप्रमुखांनी माजी विद्यार्थ्यांशी संवाद साधला. विद्यार्थ्यांनीही बहुसंख्येने सहभाग नोंदवून आपला महाविद्यालयाप्रती स्नेहभाव व्यक्त केला.संस्थाध्यक्ष व माजी राज्यमंत्री मा. रवींद्र माने, कार्यकारी अध्यक्षा सौ. नेहा माने, उपाध्यक्ष मनोहर सुर्वे, सचिव दिलीप जाधव,विश्वस्त जान्हवी माने, प्राचार्य डॉ. महेश भागवत आदी मान्यवराच्या व्यासपीठावरील उपस्थितीत हा कार्यक्रम पार पडला. तसेच महाविद्यालयाच्या सर्व विभागप्रमुख, माजी विद्यार्थी संघ समन्वयक, प्लेसमेन्ट अधिकारी, ऑफिस अधीक्षक पद्मनाभ शेलार आदी याप्रसंगी उपस्थित होते.
दीपप्रज्वलन व सरस्वती वंदनेने कार्यक्रमाची सुरुवात करण्यात आली. उपस्थित मान्यवर व माजी विद्यार्थी प्रतिनिधी म्हणून संदीप कौल यांचे स्वागत करण्यात आले. यानंतर प्रथम माजी विद्यार्थी संघ समन्वयक प्रा. इसाक शिकलगार यांनी आपल्या प्रास्ताविकात संघाची उद्दिष्ट्ये व भूमिका स्पष्ट केली तसेच  हाविद्यालयाचे प्लेसमेन्ट अधिकारी प्रा. पराग जोशी यांनी दृकश्राव्य माध्यमातून रोजगाराच्या उपलब्ध संधी, त्यासाठी महाविद्यालयामार्फत राबवण्यात येणारे उपक्रम आणि नोकरी मार्गदर्शनाविषयी माहिती दिली.
त्यांनी विविध माध्यमातून महाविद्यालयशि बांधिलकी राखलेल्या सर्व माजी विद्यार्थ्यांचे आभार मानले.
यानंतर महाविद्यालयाच्या सर्व विभागांच्या प्रमुखांनी आपल्या विभांतर्गत घडामोडी, उपक्रम, प्राध्यापक व विद्यार्थ्यांची गौरवांकित कामगिरीची माहिती दिली. १७ जुलै २०१९ ला इंग्लंड येथे होणा-या जगातील सर्वात प्रतिष्ठीत अभियांत्रिकी डीझाइन इव्हेंट म्हणजेच फॉर्मुला स्टूडंट २०१९ या स्पर्धेमध्ये निवड झालेल्या महाविद्यालयाच्या टीम एम एच ०८ रेसिंग च्या विद्यार्थ्यांनी बनवलेल्या फॉर्मुला स्टूडंट रेस कारचे सादरीकरण केले. यानंतर प्राचार्य डॉ. भागवत यांनी माजी विद्यार्थ्यांशी संवाद साधला. त्यांनी
विद्यार्थ्यांच्या यशस्वी वाटचालीबद्दल समाधान व्यक्त केले. यावेळी त्यांनी माजी विद्यार्थ्यांच्या ज्ञानाचा व अनुभवाचा उपयोग महाविद्यालयात शिक्षण घेत असलेल्या विद्यार्थ्यांना व्हावा यासाठी त्यांनी कायम महाविद्यालयाच्या संपर्कात राहण्याचे आवाहन केले. यानंतर माजी विद्यार्थी संदीप कौल, राहुल बोधे, रोहिणी बंदागले, शेफाली घाणेकर, सोमनाथ पाटील, सुमित पाटील, यांनी आपले प्रातिनिधिक स्वरुपात मनोगत व्यक्त करताना आपल्या यशामध्ये महाविद्यालयाचा फार मोठा वाट असल्याचे सांगून कृतज्ञता
व्यक्त केली.
स्नेह्भोजानानंतर कार्यक्रमाची सांगता झाली व सर्व माजी विद्यार्थ्यांना निरोप देण्यात आला. याप्रसंगी प्रा. स्नेहल मांगले यांनी उपस्थितांचे आभार मानले.
फोटो:
1. महाविद्यालयाची माजी विद्यार्थिनी रोहिणी बांडागळे आपले मनोगत व्यक्त करताना प्रसंगी व्यासपीठावर मा. रवींद्र माने,
कार्यकारी अध्यक्षा सौ. नेहा माने, उपाध्यक्ष मनोहर सुर्वे, सचिव दिलीप जाधव, विश्वस्त जान्हवी माने, प्राचार्य डॉ. महेश
भागवत आदी
2. महाविद्यालयाचे माजी विद्यार्थी संघ समन्वयक प्रा. इसाक शिकलगार प्रास्ताविकात माजी विद्यार्थी संघाची उद्दिष्ट्ये व
भूमिका स्पष्ट करताना प्रसंगी व्यासपीठावर मा. रवींद्र माने, कार्यकारी अध्यक्षा सौ. नेहा माने, उपाध्यक्ष मनोहर सुर्वे,
सचिव दिलीप जाधव, विश्वस्त जान्हवी माने, प्राचार्य डॉ. महेश भागवत आदी


Wednesday, February 27, 2019

राजेंद्र माने एम एम एस मध्ये “एक्सप्लोअर – 2 के 19” महोत्सवाचे आयोजन

प्रबोधन शिक्षण प्रसारक संस्थेच्या आंबव येथील राजेंद्र माने महाविद्यालयामधील एम.एम.एस विभागाचा
“एक्सप्लोअर – 2 के 19” हा वार्षिक युथ फेस्टिवल दिमाखात संपन्न झाला. रत्नागीरी व सिंधुदुर्ग जिल्ह्यातील
विविध पदवी महाविद्यालयात शिक्षण घेणा-या विद्यार्थ्यांसाठी या महोत्सवाचे आयोजन करण्यात येते. बेस्ट परसोना स्पर्धा व जनरल चॅम्पियनशिप सारखी मुख्य आकर्षण असणा-या या दोन दिवसीय युथ फेस्टिवलमध्ये ट्रेझर हंट, बिझीनेस क्विझ, बिझिनेस प्लान, अॅडमॅड जुनून, बेस्ट आउट ऑफ वेस्ट, रंगोली, फोटोग्राफी यासारख्या विविध गुणदर्शन स्पर्धा घेण्यात आल्या. दोन्ही जिल्ह्यातील जवळपास ३२ महाविद्यालयातील सुमारे ३०० विद्यार्थ्यांनी यामध्ये आपला उत्स्फूर्त सहभाग नोंदवून कार्यक्रम यशस्वी केला.
कार्यक्रमाचे उद्घाटन संस्थेचे संस्थापक श्री. रविंद्रजी माने यांच्या हस्ते करण्यात आले. याप्रसंगी व्यासपीठावर प्रमुख पाहुणे व गद्रे मरीन रत्नागिरीचे एक्सपोर्ट सेल्स मॅनेजर मंदार भागवत, कोलते कॉम्पुटर रत्नागिरीचे संतोष कोलते, प्राचार्य डॉ.महेश भागवत, एम एम एस विभागप्रमुख प्रा. सुदर्शन जाधव, महाविद्यालयाचे सर्व विभागप्रमुख तसेच विवध महाविद्यालयातून आलेले प्राध्यापक व स्पर्धक विद्यार्थी उपस्थित होते.
उद्घाटन कार्यक्रमाच्या सुरुवातीला काश्मीर येथे नुकत्याच झालेल्या अतिरेकी हल्ल्यात वीरमरण आलेल्या
भारतीय जवानांप्रती संवेदना व्यक्त करण्यात आली. यानंतर प्रथेप्रमाणे दीपप्रज्वलन तसेच मान्यवराचे स्वागत
करण्यात आले. एक्सप्लोअरचे संयोजक प्रा. सुदर्शन जाधव यांनी प्रास्ताविक करताना फेस्टिवल आयोजनामागील उद्देश स्पष्ट केला. तसेच विभागाच्या वतीने उपस्थित मान्यवर व स्पर्धक विद्यार्थ्यांचे स्वागत केले. यानंतर महविद्यालयाचे प्राचार्य डॉ. महेश भागवत यांनी आपले मनोगत व्यक्त करताना परिसरातील पदवी महाविद्यालयातील विद्यार्थ्यांना त्यांची कौशल्ये विकसित व्हावीत व त्यांचा सर्वंकष विकास व्हावा यासाठी माने महाविद्यालयाने उचललेले हे एक पाउल असल्याचे सांगितले.
यानंतर संतोष कोलते म्हणाले विद्यार्थ्यांनी आपल्या शिक्षणाकडे पुढे स्वतः उद्योग उभारण्याच्या दृष्टीकोनातून
पहायला हवे. तसेच यासाठी संवाद कौशल्य आणि व्यक्तिमत्व या दोन्ही बाबीही यासाठी तितक्याच महत्वाच्या आहेत.प्रमुख पाहुणे मंदार भागवत यांनी उपस्थित विद्यार्थ्यांना व्यवस्थापकिय शिक्षण व रोजगार यावर विशेष मार्गदर्शन केले.त्यांनी अशाप्रकारच्या स्पर्धांमध्ये विद्यार्थ्यांचा सहभाग फार महत्वाचा असल्याचे सांगितले.
माजी राज्यमंत्री श्री. रवींद्र माने यानी प्रथम सीमेवरील शहीद जवानांना श्रद्धांजली अर्पण करून आपल्या भाषणाला सुरुवात केली. त्यांनी उद्योग धंद्यामध्ये यशस्वी होण्यासाठी व्यवस्थापकीय ज्ञान उपयुक्त असल्याचे सांगून इच्छाशक्ती,आत्मविश्वास, मेहनतीपणा यासारख्या गुणांकडेही विद्यार्थ्यांनी लक्ष द्यावे असे सांगितले.
यानंतर सलग दोन दिवस विविध प्रकारच्या स्पर्धा पार पडल्या. विशेषत्वाने दिव्यांच्या प्रकाशझोतात महाविद्यालयाच्या भव्य व हिरव्यागार प्रांगणात बेस्ट परसोना स्पर्धा रात्रीचे वातावरण धुंद करून गेली. कोकण फिल्म इंस्टीट्युट चिपळूणचे सत्येंद्र राजे आणि एल अॅड टी फायनान्स कोल्हापूरचे योगेश कुंभार यांनी या स्पर्धेचे परीक्षण केले. यामध्ये मिस्टर आणि मिस एक्सप्लोअर निवडण्यात आले. डीबीजेचा स्टीफन अलवी मिस्टर एक्सप्लोअर तर बाईंग कॉलेज लांजाची सविता पुजारी मिस एक्सप्लोअर ठरली.
प्रामुख्याने आठल्ये सप्रे महाविद्यालय देवरुख, गोगटे जोगळेकर महाविद्यालय रत्नागिरी, डी.बी.जे महाविद्यालय
चिपळूण, बी.एच.बाईग महाविद्यालय लांजा, , एस आर एम कॉलेज कुडाळ, डी एस जि कॉलेज सावंतवाडी, केळकर कॉलेज देवगड च्या विद्यार्थ्यांनी या महोत्सवामध्ये आपली छांप पडली. स्पर्धेचा सांगता समारंभ गोगटे जोगळेकर महाविद्यालय रत्नागिरीच्या कॉमर्स विभाग उपप्राचार्या डॉ. यास्मिन आवटी यांच्या प्रमुख उपस्थितीत पार पडला.
आपल्या भाषणात त्यानी अष्टपैलू व्यक्तिमत्व काळाची गरज असून त्यासाठी असे उपक्रम उपयुक्त ठरतील असा विश्वास व्यक्त केला. सहभागी स्पर्धकांनीही या फेस्टिवलमधील सहभाग व महाविद्यालय परिसरातील दोन दिवस एक सुंदर अनुभव होता असे सांगितले. मा. रवींद्र माने, प्रद्युम्न माने, प्राचार्य डॉ महेश भागवत, विभागप्रमुख प्रा. सुदर्शन जाधव आणि मान्यवराच्या हस्ते विजेत्यां विद्यार्थ्यांना प्रमाणपत्रे, रोख रकमेची पारितोषिके देण्यात आली. देवरूखच्या आठल्ये सप्रे महाविद्यालयाच्या विद्यार्थ्यांनी जास्तीत जास्त विजेतेपदे मिळवत एक्सप्लोअर २ k १९ जनरल चॅम्पियनशिप पटकाविली.
ज्योत्स्ना यादव, पूर्वा पटेल, सुमित आम्रे यांनी सूत्रसंचालन केले. या संपूर्ण स्पर्धा महोत्सवाचे समन्वयक म्हणून प्रा.
मासुमा पागारकर यांनी काम पाहिले. तर नियोजनामध्ये एम एम एस विभागातील सर्व प्राध्यापक, विद्यार्थी प्रतिनिधी व इतर कर्मचा-यांचे बहुमोल सहकार्य लाभले.

फोटो: १) मिस्टर आणि मिस एक्सप्लोअर आणि मान्यवर परीक्षक
२) विजेत्या महाविद्यालयाला “एक्सप्लोअर २ k १९ जनरल चॅम्पियनशिप” प्रदान करताना संस्थाध्यक्ष मा.
रवींद्र माने, प्रमुख पाहुण्या डॉ. यास्मिन आवटी, प्राचार्य डॉ. महेश भागवत.




राजेंद्र माने अभियांत्रिकी महाविद्यालयात शिवजयंती उत्साहात

आंबव येथील प्रबोधन शिक्षण प्रसारक संस्थेच्या राजेंद्र माने अभियांत्रिकी महाविद्यालयामध्ये शिवजयंती विविध उपक्रमांनी साजरी करण्यात आली. महाविद्यालयाच्या सर्व प्राध्यापक, विद्यार्थी व विद्यार्थिनी यामध्ये हिरीहीरीने सहभागी झाले होते.
यादिवशी पहाटे संगमेश्वर येथील छत्रपती संभाजी महाराज स्मारक या ठिकाणी स्वच्छता करून पूजा करण्यात आली. त्यानंतर याठिकाणी शिवज्योत प्रज्वलित करून छत्रपती शिवाजी महाराजाची पालखी ढोल ताशांच्या गजरात मिरवणुकीने आंबव येथील महाविद्यालाच्या प्रांगणात आणण्यात आली. महाविद्यालयाच्या प्रवेशद्वारावर शिवज्योत व पालखी येताच महाविद्यालयाचे प्राचार्य डॉ. महेश भागवत व उपस्थितांनी विधिवत पूजन केले तसेच प्रवेश्द्वारावरील छत्रपती शिवाजी महाराजाच्या पूर्णाकृती अश्वारूढ पुतळ्याला पुष्पहार अर्पण करून महाराजांना अभिवादन केले. शिवचरित्र अभ्यासक प्रा. अरविंद कुलकर्णी यांचे यानंतर व्याख्यान झाले. शिवआरतीने व्याख्यानाला आरंभ करण्यात आला. प्रा कुलकर्णी यांनी “आजचा राष्ट्रवाद आणि शिवचरित्र” हा विषय घेऊन उपस्थितासमोर महाराजांचे जीवन व सध्ध्याचा राष्ट्रवाद यातील दुवा जोडण्याचा प्रयत्न केला. ते म्हणाले, शिवकालीन घटना या वास्तव असून आजही अचंबित करून जातात. त्यांचे चरित्र हे स्वधर्म, स्वदेशी व स्वभाषा या त्रिसूत्रीवर आधारलेले आढळते. महाराजांनी भारतामध्ये या तिन्ही गोष्टींचा सर्वप्रथम जागर केला. स्वधर्माचे उत्तम पालन व आचरण केले. स्वदेशीसाठी मोगल साम्राज्यामुळे उध्वस्त झालेल्या कारागिरांना पुन्हा प्रस्थापित केले. संगमेश्वरी गलबते, मजबुत किल्लेबांधणी यासारख्या गोष्टी त्याची आजही साक्ष देत आहेत. स्वभाषां जपण्यासाठी त्यांनी मराठीतून राज्यकोषही निर्माण केला. मात्र आजचा राष्ट्रवाद हा छत्रपतींच्या विचाराबरोबरच मोगल व ब्रिटीश साम्राज्य या सर्वांचे मिश्रण आहे. ते शेवटी म्हणाले कि, महाराजांच्या विचारातून अखंड जागरूकता, सावधानता, सामर्थ्य व प्रभावी प्रशासनाचा संदेश मिळतो.
राष्ट्राकल्याणासाठी त्यांचा हा आदर्श सर्वांनी अंगिकारला पाहिजे.महाविद्यालयाच्या काही विद्यार्थ्यांनीही यावेळी महाराजांवरील आपले विचार व्यक्त केले. महाविद्यालयाचे प्राचार्य डॉ. महेश भागवत यांच्या मार्गदर्शनाखाली इतिहास मंचचे समन्वयक प्रा. विशाल पारकर यांनी कार्यक्रमाचे नियोजन केले. प्रा. अच्च्युत राउत
तसेच महाविद्यालयाच्या शिवप्रतिष्ठान व इतिहास मंचचे विद्यार्थी प्रतिनिधीं व सदस्य यांचेही सहकार्य लाभले.
फोटो: १) छत्रपती शिवाजी महाराजाची पालखी व शिवज्योत ढोल ताशांच्या गजरात मिरवणुकीने महाविद्यालयामध्ये आणताना
२) शिवचरित्रावर व्याख्यान देताना प्रा. अरविंद कुलकर्णी, उपस्थित मान्यवर, प्राध्यापक आणि विद्यार्थी विद्यार्थिनी